“Klasat janë të mbipopulluara, korridoret janë të ngushtë dhe mjediset sportive i kemi të kufizuara”, thotë drejtori Idrish Patel i cili është në krye të shkollës “Vajzat muslimane të Boltonit”. Shkolla është shtetërore dhe e superkërkuar nga vajzat muslimane në qytet. Në të nuk ka mjedise të mira sportive, madje as kuzhinë. Por, pavarësisht ndertesës modeste, shkolla ka arritur rezultate mbresëlënëse.
E krahasuar me shkolla të tjera në të cilat të paktën 30 për qind e nxënësve janë nga shtresa të paprivilegjuara, shkolla renditet e treta në vend për performacën akademike. Kjo e bën shkollën “Vajzat muslimane të Boltonit” të thyejë bastionin e krijuar në kryeqytetin britanik në renditjen e shkollave më të mira.
Në vitin 2015, 83 për qind e studenteve të saj arritën pesë ose më shumë nota A* – Cs, përfshirë edhe në lëndë si anglishtja e matematika, në provimin GCSE që verifikon njohuritë për arsimin e moshave 14 -16 vjeç. Për shkak të nivelit të saj të studentëve që vijnë nga shtresa të paprivilegjuara, që shkon në 32 për qind, arritja është edhe më e madhe.
Drejtori Patel thotë se suksesi u detyrohet lidhjeve të forta komunitare dhe një stafi të palodhur. Priroritet i shkollës është të ketë mësues me një jetë të balancuar mes punës dhe jetës private, diçka që drejtori e ka rregull edhe në hartimin e orarit të përditshëm të mësimdhënies.
“Shkolla jonë nis herët. Mësuesit tanë janë këtu që në 8 të mëngjesit, për të nisur mësimin në orën 8:15. Të premteve, mbarojmë në mesditë, kështu që ata mund të kenë një fundjavë të zgjatur prej dy ditësh e gjysmë.”
Mësimet mbarojnë gjithashtu në orën 2:25 të mërkurave, kështu që mësuesit kanë një orë për të shpenzuar për zhvillimin e tyre profesional apo për të analizuar progresin e nxënësve.
Analizimi i të dhënave ka qenë çelës për suksesin e shkollës, shton Patel. Ai e përshkruan sistemin si një “rreze lazer”. “Ne analizojmë në detaje, duam të dimë njohuritë specifike që duhen për secilën nxënëse, kush është në krye, kush ka nevojë për nxitje dhe sa mund të kërkojmë prej tyre.”
Nëse një nxënëse mbetet pas, shkolla jep mbështetje shtesë me anë të studimit të veçantë ose në grupe të vogla. Planet mësimore gjithashtu janë përshtatur: “Pas vlerësimit të mësuesve, identifikohen fushat për zhvillim të mëtejshëm, dhe mësimet strukturohen në këto hapësira”.
Nxënësit në shkollë e nisin përgatitjen për provimin GCSE që në vitin e 9-të, për të reduktuar kështu presionin që vjen nga provimet. “Kështu, për shembull, në vitin e tetë nisim të mendojmë se për çfarë dëshirojnë të ndjekin, çfarë mundësish kanë dhe rrugët që janë të hapura për ta”.
Në vitin e 9-të nxënësit shpenzojnë kohë në zhvillimin e aftësive që nevojiten për të kapur lëndët e provimit përpara se të përparojnë në njohuritë kyçe të kërkuara. Shkolla duhet të jetë një vend ku nxënësit mund të bëjnë edhe gabime, thotë drejtori.
Në të gjithë Boltonin, niveli mesatar i marrjes së provimit GCSE për A*–Cs, përfshirë anglishten dhe matematikën, është 57 për qind, krahasuar me disa zona të Londrës që variojnë në 52-73 për qind. Shkollat në këtë zonë përballen me shumë sfida, që nga beteja për të rekrutuar mësuesë deri tek humbjet më të larta se mesatarja.
Patel thotë se shkolla ka fatin të ketë prindër fëmijësh që janë shumë kërkues për të qenë të përfshirë në arsimimin e fëmijëve dhe një staf të angazhuar që është i lumtur të caktojë takime me prindërit jashtë axhendës së përcaktuar nga shkolla.
Suksesi i shkollës është një nxitje për komunitetin lokal, shton Patel. “Pavarësisht nëse është një shkollë muslimane apo jomuslimane, si qytetarë britanikë ne presim që të gjithë të shkëlqejnë, pavarësisht klasës, fesë apo se në cilën pjesë të Britanisë jetojnë”.
Shpresat e tij për shkollën në të ardhmen e afërt: të mbajë rezultatet e arritura dhe, ndoshta, nëse do të ketë fonde, të ngrejë një mensë të re.
Marrë nga: The Guardian
Përgatiti: Juli Prifti – /tesheshi.com/
