Nga Mensur Krasniqi
Në kuadër të vizitës së saj që i ka bërë shteteve të rajonit, Shqipërisë dhe Kosovës, Ndihmës-Sekretarja amerikane e Shtetit për Evropën dhe Euroazinë, Victoria Nuland ka vazhduar agjendën e takimeve me përfaqësues politik edhe në Maqedoni.
Interesante përbën fakti se Nuland fillimisht në ambasadën e SHBA-ve ka pritur ndaras liderët e partive politike shqiptare përpara atyre maqedonase.
Pas këtij takimi, lideri i Bashkimit Demokratik për Integrim, Ali Ahmeti nuk është paraqitur para gazetarëve për prononcim, mirëpo ka zgjedhur rrjetin social facebook që të njoftojë mbi temat që janë diskutuar në këtë takim. Ashtu siç shkruan Ahmeti, ka siguruar zonjën Nuland se ditët në vijim do sjellin kompromisin e shumë pritur të liderëve partiak për dalje nga kriza politike.
“Si gjithmonë diskutuam hapur dhe miqësisht për mënyrat se si të zgjidhet kriza politike në vend dhe të rikthehet fokusi në agjendën integruese EuroAtlantike. Sigurova zonjën Nuland që BDI është pjesa më konstruktive e zgjidhjes së çështjes si dhe shpreha bindjen për arritje të shpejtë të kompromisit nga palët në ditët në vijim. Ky kompromis duhet të rezulton me zgjedhje gjithëpërfshirëse, të besueshme dhe demokratike sa më shpejtë që është e mundur”, ka shkruar kreu i BDI-së, Ali Ahmeti, në rrjetin social Facebook.
Nga ana tjetër, kreu i partisë më të madhe opozitare shqiptare në Maqedoni, PDSH-së, Menduh Thaqi ka deklaruar para mediave se Maqedonia është shtet fatlum që SHBA është aleat kryesor i shqiptarëve dhe i Maqedonisë. Ai shoti se nëse partitë nuk e shfrytëzojnë momentin e ardhjes së Nuland, situata mund të bëhet e pashpresë.
“Përsëris edhe një herë se jemi fatlum që SHBA si aleat kryesorë i shqiptarëve dhe i Maqedonisë, ka një interesim të jashtëzakonshëm që të na ndihmojë të largohemi prej kësaj pikës së krizës. Është momenti, përsëris është moment shumë i rëndësishëm, që ta shfrytëzojmë gjithë këtë çështje dhe të bëhet debllokomi i krizës politike. Përndryshe, shpresat do të humbin në tërësi nëse tash nuk bëhet asgjë”, deklaroi Thaçi.
Kujtojmë se pasdite Nuland do të ketë takime edhe me kreun e LSDM-së dhe VMRO-së Zoran Zaev, gjegjësisht Nikolla Gruevski, në selitë e tyre partiake.
Përveç përfaqësuesve politikë, në takim në ambasadë ishin edhe përfaqësues të sektorit civil, por edhe prokurorja speciale, Katica Janeva.
Ndërsa në agjendën e takimeve të saja çuditërisht zonja Nuland nuk ka planifikuar takime as me presidentin e shtetit, Gjorgje Ivanov dhe as me kryeministrin e përkohshëm të Maqedonisë, Emil Dimitriev. /tesheshi.com/
