Pjesa më e madhe e kryebashkiakëve që kanë nxjerrë urdhërin për ndalimin e burkinit po refuzojnë të heqin kufizimet, pavarësisht se gjykata më e lartë administrative e vednit vendosi se ndalimet janë të paligjshme, duke ia lënë shtetit të përballet me dilemën sesi duhet të reagojë.
Më shumë se 20 kryebashkiakë kanë mbajtur në fuqi dekretin e tyre në një sfidë të hapur, duke bërë të mundur që policitë bashkiake të ndalojnë dhe gjobisin gratë në plazhe që mbajnë kostume banjoje që mbulojnë gjithë trupin, pavarësisht vendimit nga këshilli administrativ shtetëror që thotë se “ndalimet janë një shkelje serioze dhe që manifeston dhunim të të drejtave themelore”.
Në një rast test të marrë në shqyrtim nga gjykata administrative u vendos të pezullohej ndalesa e burkinit, e kjo ka vendosur një precedent ligjor që duhet ndjekur. Gjykata vendosi heqjen e ndalimit për burkinin në qytetin e rivierës franceze, Villeneuve-Loubet, që ishte e detyruar të ndalonte menjëherë zbatimin e dekretit. Por vendimi është hedhur poshtë nga të gjithë kryebashkiakët e qyteteve të tjera.
Ministri i Brendshëm, Bernard Cazeneuve, i cili apeloi për qetësi dhe paralajmëroi kundër stigmatizimit të muslimanëve në Francë, pritet të bëjë një njoftim për këtë çështje. Ministrja e të gjelbërve për Strehimin, Emmanuelle Cosse, tha se kryebashkiakët që refuzojnë vendimin e gjykatës po luajnë me zjarrin.
Pjesa më e madhe e dekreteve të ndalimit të burkinit, janë ende në fuqi, përfshirë Nisën dhe një sërë qytetesh turistikë përgjatë Côte d’Azur. Kryebashkiaku i Kanës, David Lisnard, nga partia Republikane e ish-presidentit Nicolas Sarkozy ishte i pari që nxorri ndalimin e burkinit në verë. Ai tha se nuk do të zmbrapsej. Sipas tij, vendimi “nuk e ndryshon në asnjë mënyrë bindjen time që veshjet e tepruara, të cilitdo besimi, janë një problem në situatën aktuale”.
Vetëm dy kryebashkiakë kanë hequr ndalimin e burkinit pas vendimit për Villeneuve-Loubet ruling: kryebashkiaku socialist i Oye-Plages, në afërsi të Calais dhe kryebashkiaku centrist i Eze në Alpes-Maritimes.
Kryebashkiakët nga partia e krahut të djathtë, ajo Republikane dhe ata që i përkasin të djathtës ekstreme, Frontit Nacional mbajnë në fuqi urdhërin e ndalimit për burkinin, duke këmbëngulur se rasti i Villeneuve-Loubet nuk mund të aplikohet dhe për ta.
Ndalimi i burkinit – që tashmë shihet si i paligjshëm – përbën një problem të madh në shettin francez që është përgjegjës që të sigurohet respektimi i ligjit. Në teori, shteti mund të kërkojë nga prefektët të ndërmarrin veprime për të detyruar kryebashkiakët të tërheqin dekretet. Grupet e të drejtave të njeriut kanë thënë gjithashtu, se do të padisin qytetet në gjykatë.
Kryeministri socialist, Manuel Valls, ka sjellë përçarje në partinë e tij duke mbështetur ndalimin e burkinit, kur tha se debati politik për burkinin duhet të vazhdojë. Në një deklaratë në rrjetet sociale, ai tha se burkini ishte “pohim i Islamit politik në hapësirën publike”.
Përgatiti: Juli Prifti – /tesheshi.com/
