Arda Turan do duhej që të dielën në mbrëmje të ishte në fushën e blertë të “Loro Boriçit” në Shkodër, ku përfaqësuesja e Kosovës dhe ajo e Turqisë do të ndeshen për eliminatoret e Kupës së Botës.
Ngjarjet e ditëve të fundit e pamundësuan diçka të tillë, pasi Arda Turan nuk është më pjesë e kombëtares së Turqisë.
Një përplasje me një gazetar në avionin që i çonte lojtarët turq drejt Triestes do të sillte lënien e lojtarit jashtë grumbullimit për ndeshjen me Kosovën. Vendim i cili u shoqërua me atë të vetë Arda Turan-it, duke e lënë përfundimisht përfaqësuesen.
Ish-kapiteni i Turqisë do të deklaronte në konferencën e shtypit se ndihej si një zog pas tërheqjes.
E tani Arda Turan ka zgjedhur t’i kalojë ndryshe këto ditë, me një vizitë në Qabe, për të kryer umren.
“Arda Turan shkoi në umre,” është titulli i thuajse të gjitha të përditshmeve turke, bashkëshoqëruar thuajse me të njëjtën fotografi.
Një avion i posaçëm i ka dërguar futbollistin e Barcelonës dhe një numër bashkudhëtarësh drejt Medinës mesnatën e së shtunës.
Me probleme dhe në klubin katalanas, ku ende nuk dihet në do të qëndrojë apo do të kalojë në ndonjë skuadër tjetër, Arda Turan ka menduar ta gjejë qetësinë shpirtërore duke kryer umren. /tesheshi.com/
