Lojtarët shqiptarë janë ndeshur shpesh me probleme vizash, me kthime të pashpjegueshme nga vendet ku kanë vajtur, e me një sërë situatash të këtij lloji, por ky telash i pazakontë i ka zënë dhe pesë futbollistë të Romës.
Seydou Doumbia dhe Gervinho nga Bregu i Fildishtë, Victor Ibarbo nga Kolumbia, Antonio Sanabria nga Paraguaji dhe Adem Ljajiç nga Serbia kanë shtangur pasi krejt papritur u është refuzuar hyrja në Indonezi natën e shkuar.
Të pesë lojtarët janë pjesë e Romës, e bashkë me shokët e skuadrës kanë fluturuar për në Indonezi për një aktivitet futbollistik parasezonal. Ndërsa të gjithë pjesëtarët e tjerë të ekipit kanë kaluar pa problemet në pikat e kontrollit kufitar, këta lojtarë nuk janë lejuar të vënë këmbën në tokën indoneziane.
Autoritetet vendore nuk kanë dhënë asnjë arsye për refuzimin, teksa pesë lojtarët janë detyruar të fluturojnë më pas drejt Italisë.
Shefi ekzekutiv i ekipit të Romës, Italo Zanzi, ka shprehur zhgënjimin për atë që ka ndodhur, por nuk e ka mohuar faktin se pritja nga sportdashësit vendas në aeroport, në rrugët e në hotelin në Xhakarta ishte më e ngrohta që kishte ndeshur ndonjëherë.
Ekipi roman gjendej prej ditësh në Australi, në një turne parasezonal, ku luajti ndaj Realit të Madridit dhe Mançester Sitit, me ndeshjen e parë të fituar me 11-metërsha, e me të dytën të humbur në të njëjtën mënyrë. Indonezia është ndalesa e fundit e turneut përgatitor të Romës. /tesheshi.com/
