Edhe pse duket se emri i ri i shuajti tërësisht mosmarrëveshjet mes Shkupit e Athinës, nga pala greke vijojnë ende të “bien boritë” e kontesteve identitare karshi fqinit verior.
Kështu, Ministria e Punëve të Jashtme të Greqisë ka publikuar në faqen e saj të internetit një trajtesë dedikuar emrit të ri “Republika e Maqedonisë Veriore”, ku thuhet se ideja e ekzistencës së kombit dhe të shtetit maqedonas ka ardhur nga ish-presidentit jugosllav Josip Broz Tito; pra, duke lënë të nënkuptuar se është një artific politik i një kohe të shkuar.
“Tito, duke i dhënë statusin e një njësie federale në kuadër të Jugosllavisë së re federale, e ndryshoi emrin e saj në Republikën Popullore të Maqedonisë e më vonë në Republikën Socialiste të Maqedonisë. Me këtë, ai filloi të krijojë idenë e një kombi të veçantë dhe të ndryshëm të Maqedonisë”, thuhet në tekst.
Kohët e fundit, Ministria e Punëve të Jashtme e Maqedonisë reagoi ndaj këtij tekstt të diskutueshëm dhe kolegët e tyre grekë e larguan atë. Megjithatë, ata e kanë rikthyer sërish trajtesën ngacmuese.
“Historikisht, emri Maqedoni i referohet mbretërisë dhe kulturën e maqedonasve të lashtë, të cilët i përkasin kombit grek dhe janë pjesë e pandashme e trashëgimisë historike dhe kulturore të Greqisë”, sipas faqes së internetit të Ministrisë së Punëve të Jashtme të Greqisë. /tesheshi.com/
