Punonjësit e arsimit si duket kësaj radhe e kanë përnjëmend. Ata paralajmëruan disa herë grevë, por u tërhoqën në momentet e fundit, pasi që merrnin premtime nga Ministria e Arsimit dhe ajo e Financave se kërkesat e tyre do të plotësohen.
Sot të dyja ndërrimet, paradite dhe pasdite, nxënësit nuk do të mbajnë mësim.
Kryetari i SBASHK- ut Rrahman Jasharaj tha se raportet e para të dërguara nga të gjitha shkollat e Kosovës tregojnë se greva po mbahet në shumicën e shkollave.
“Mund të ketë ndonjë përjashtim në ndonjë shkollë që të mbahet mësimi, por në shumicën e shkollave po mbahet greva. Mësimdhënësit kanë filluar grevën në ora 08:00 dhe do të mbahet deri në ora 12:00 “, ka thënë Jasharaj.
Mësim për nxënësit, ai tha se nuk do të ketë sot në të dyja ndërrimet. Greva po mbahet dhe në Universitetin e Prishtinës, raporton zëri. “Greva është duke u zhvilluar dhe në universitet”, tha Jasharaj, duke konfirmuar se kjo sindikatë nuk do të tërhiqet derisa të realizohet kërkesa e mësimdhënësve që me pagën e prillit, t’iu paguhet dhe shtesa e 0.5 për qindëshit për vitet e shërbimit.
