Së paku 33 refugjatë, mes të cilëve pesë fëmijë, u mbytën këtë të shtunë ndërsa barka e tyre u përmbys teksa po lundronte nga brigjet turke drejt ishullit grek të Lesbosit.
Refugjatët ishin nisur nga Ajvaxhëku, në provincën e Çanakalesë, por për një pjesë të mirë të tyre, mes të cilëve sirianë e afganë, udhëtimi në Egje rezultoi fatal.
Ekipet e shpëtimit nxorën trupat e 33 të mbyturve, si dhe shpëtuan 75 të tjerë, që u dërguan më pas në spitalin e zonës për trajtim mjekësor.
Drejtuesi i bashkisë së Ajvaxhëkut i deklaroi një televizioni turk përmes telefonit se druhej që numri i të mbyturve mund të rritej me kalimin e orëve.
Rruga detare mes brigjeve turke dhe ishujve grekë është bërë dendur kohët e fundit shkak për një mori tragjedish, ndërsa, sipas Organizatës Ndërkombëtare për Migracionin, vetëm gjatë këtij muaji kanë humbur jetën 244 refugjatë e emigrantë. Kjo shifër është tepër e lartë krahasuar me të njëjtën periudhë të dy viteve paraardhëse. 12 persona vdiqën në janarin e 2014-ës, kurse në të 2015-ës numri i tyre shkoi në 82. /tesheshi.com/
