Nuk kanë të mbaruar gafat e polemikat rreth miliarderit amerikan, Donald Trump, që ka hyrë në garën për nominimin nga republikanët, për presidencialet e vitit të ardhshëm.
Në një postim në Twitter për mbështetësit e vet, manjati eksentrik ndërsa lancon sloganin “Ta bëjmë Amerikën të madhe sërish”, e shoqëron me imazhin e disa ushtarëve me uniformë naziste.
Gafa është vënë re nga një docent i Universitetit amerikan të Marinës, John Schindler, që nga ana e vet, ka ndarë në Twitter postimin që ka bërë edhe xhiron e botës.
Stafi i Trump ka hequr menjëherë postimin dhe ka fajësur një stazhist që ka krijuar imazhin e nuk ka vënë re gabimin.
Zhytja e Trump në fushatë, që është në qendër të polemikave edhe për deklaratat kundër emigracionit, e bën akoma më të ndezur sfidën e saponisur në distancë të dyshes Hillary Clinton-Jeb Bush.
