Mbyllet në barazim 1-1 përballja më kulminante e futbollit spanjoll. Barcelona dhe Reali i Madridit janë ndarë në paqe në të famshmen “El Clasico”.
Dhe merita e veçantë për këtë i përket Sergio Ramos-it, që bëri atë çka e ka bërë shpesh ndaj shumë ekipeve: të shënojë me kokë në çastet e fundit.
Reali i Madridit vinte në “Camp Nou” me moral shumë më të lartë se pritësit. Të parët në klasifikimin e Primera Divizionit, madrilenët i kishin fituar pesë takimet e fundit në të tëra veprimtaritë.
Por udhëtuesit nuk përfituan nga një Barcelonë tejet e turbullt në pjesën e parë, që vështirë se pati ndonjë aksion të mirëmenduar, siç është në traditën e saj.
Pas një 45-minutëshi të parë pa gola, rezultati do të ndryshonte në minutën e 53-të, kur shënoi me kokë Luis Suarez. Futja e Iniesta-s në minutën e 60-të i dha tjetër pamje së lojës së katalanasve, që të nxitur dhe nga goli nisën të shihnin shumë më tepër përpara. Messi pati një rast të pastër, por u tregua egoist, duke mos pasuar e duke gjuajtur vetë keq.
Në dëshpërim, Reali bëri presion në minutat e fundit, kur dhe erdhi goli i barazimit. Ramos, si rëndom në kësi momentesh, shfrytëzoi një top të ardhur nga krahu i majtë i sulmit dhe e çoi atë me kokë në rrjetë në minutën e 90-të.
Rezultati 1-1 nuk ndryshoi as pas sulmit të fundit të Barcelonës, teksa Casemiro e hoqi topin që po shkonte në rrjetë.
Barazimi e lë pa ndryshuar largësinë prej gjashtë pikësh mes dy skuadrave, me Realin që mban kryesimin e Barcelonën që e ndjek nga pas. /tesheshi.com/
