E enjte, 12 janar! Në stadiumin “Ramon Sanchez Pizjuan” luhet ndeshja e dytë mes Seviljes dhe Realit të Madridit për një të tetat e Kupës së Mbretit. Të zotët e shtëpisë kryesojnë 3-2 nga fundi i lojës. Reali është i kualifikuar gjithsesi, por humbja do ta linte në një nivel me Barcelonën për rekordin e ndeshjeve pa humbje, të vendosur nga katalanasit më herët.
Sado i kritikuar, Benzema gjendet gjithmonë në vendin e duhur, në kohën e duhur. Francezi, i futur në lojë në çerekorëshin e fundit, shënon në minutën e 93-të, duke i barazuar shifrat: 3-3!
Reali ka tashmë një rekord që nuk e ndan me asnjë: 40 ndeshje radhazi pa humbur!
Humbja e fundit për madrilenët është regjistruar goxha larg në kohë, më 6 prill 2016, kur ata i dorëzoheshin Volfsburgut tepër entuziast në çerekfinalen e parë të Champions League-s.
Fitorja 4-0 ndaj Eibarit tre ditë më pas do t’i jepte udhë marshimit pa humbje të Realit, me rekordin të rrumbullakosur mbrëmë me barazimin ndaj Seviljes. Për ironi të fatit, rekordi do të kalojë një tjetër provë të dielën në mbrëmje në të njëjtin stadium, kur Sevilja dhe Reali, përkatësisht në vend të dytë dhe të parë në La Liga, do të përballen rishtas në kuadër të kampionatit.
Zinedine Zidane, një kohë ylli në fushë i Realit, tani ka meritën e drejtimit të këtij Reali rekordesh: 31 ndeshje të fituara dhe nëntë të barazuara!
115 gola janë shënuar gjatë periudhës së këtij rekordi, ndërsa janë pësuar vetëm 39. Janë 22 lojtarët që kanë shënuar, por kryeson Ronaldo, me 26 gola, ndjekur nga Benzema me 14 gola e Bale me 11 të tillë.
Trofetë e Champions League-s, e Superkupës së Europës, si dhe të Kupës së Botës për Klube janë bërë të Realit në këtë rrugëtim të suksesshëm.
Reali vijon, ndërkaq, të mbetet pretendent i padiskutueshëm në aktivitetet e futbollit spanjoll, si dhe në Europë.
Me këto paraqitje, deklaronte para ca ditësh një njohës i mirë i futbollit në Spanjë, vështirë që Reali të ndalet së afërmi. /tesheshi.com/
