Stambolli është tronditur në nisje të 2017-s nga një plojë në një klub nate. Nga sulmi me armë kanë humbur jetën 39 persona e janë plagosur 69 të tjerë, katër prej të cilëve në gjendje të rëndë.
Ngjarja e rëndë, një sulm terrorist sipas autoriteteve turke, ka ndodhur rreth orës 01:15, në Ortakoj, në një zonë të njohur për lokalet e natës.
Në shenjë ka qenë Reina, një prej klubeve të natës më me emër në Stamboll, i frekuentuar fort nga të huajt, nga elita, nga artistë, aktorë e futbollistë të njohur. Në lokal mendohet se ka patur mbi 600 njerëz.
“Në 01:15, një terrorist me armë vrau punonjësin e policisë që gjendej jashtë, e pastaj vrau një tjetër qytetar për të hyrë në klub. Më pas ai kreu këtë akt të dhunshëm dhe mizor duke derdhur plumba mbi njerëzit e pafajshëm që po festonin vitin e ri,” deklaroi prefekti i Stambollit, Vasip Shahin.
Ministri i Brendshëm turk, Sulejman Sojllu, raportoi për identifikimin e 21 prej viktimave. Ai u tha gazetarëve se forcat policore ishin në kërkim të terroristit e se shpresonte që ai ose ajo të kapej shpejt.
Masat e sigurisë kanë qenë të larta gjatë këtyre ditëve në qytetet kryesore të Turqisë. Rreth 25.000 punonjës të forcave të sigurisë kanë qenë në detyrë në Stamboll gjatë kremtimeve të Vitit të Ri.
Sulmi i këtij 1 janari vjen tre javë pas dy shpërthimeve terroriste pranë stadiumit të Beshiktashit, ku humbën jetën dhjetëra persona, pjesa më e madhe të cilëve ishin pjesëtarë të forcave të sigurisë. /tesheshi.com/
