Kthimi vullnetar i azilkërkuesve nga Shqipëria në këmbim të një sasie të hollash prej 600 eurosh ishte ofertë e Qeverisë gjermane që përfundoi më 24 Korrik. Lajmin e bëri të ditur vetë ambasada gjermane në Tiranë e cila përmes një njoftimi sqaroi se oferta ka përfunduar.
“Ky informacion është i gabuar. Informacioni i vërtetë është se në fillim të korrikut 2015, për azilkërkuesit nga Ballkani, u bë oferta e mëposhtme unike dhe e limituar në kohë: Personat, të cilët kanë tërhequr aplikimin e tyre për azil deri më 24 korrik 2015 dhe do të dalin nga Gjermania deri më 14 gusht 2015, mund të marrin një mbështetje financiare nga Qarku Federal Lörrach. Kjo ofertë nuk është më e vlefshme që prej datës 24 korrik 2015. Në të ardhmen nuk do të ketë shpërblim në para në rast kthimi vullnetar në atdhe”, thuhet një njoftimin shkurt dhe qartë të ambasadës gjermane në Tiranë.
Së fundmi, media pasqyroi gjerësisht kthimin vullnetar të azilkërkuesve që kishin pranuar ofertën e Qeverisë gjermane, por e paraqiti atë si një praktikë në vijim për të gjithë shqiptarët që dëshironin të ktheheshin vullnetarisht nga Gjermania. /tesheshi.com/
