Ndeshja e parë gjysmëfinale e Champions League-s u mbyll pa gola, 0-0. Mungesa e Ronaldo-s, dalja nga loja e David Silva-s dhe Benzema-së, e privuan përballjen mes Mançester Sitit dhe Realit të Madridit nga cilësia.
Me një pjesë të parë ku vështirë të kishte diçka për t’u vënë në pah, 45 minutat e dyta do të ishin më tërheqëse, me më shumë ritëm e vështrim nga portat respektive.
Ndërsa vendasit vuajtën nga emocionet e tepërta, udhëtuesit u treguan më të guximshëm në iniciativën e tyre. Hart qe vendimtar me pritjet e tij më së paku në dy raste të pastra, duke mos i lënë madrilenët t’i gëzoheshin një goli në fushë kundërshtare.
I kënaqur u duk Manuel Pellegrini, trajneri i Man. Sitit, pas ndeshjes, duke deklaruar se mori atë që priste nga lojtarët e tij.
“Nuk prisja më tepër nga ekipi im. Ushtruam fort presion, por nuk mundëm të krijonim, veçanërisht pas lëndimit të Silva-s. Të dy ekipeve u mungoi krijueshmëria, por ne kishim një sjellje më të mirë dhe treguam më shumë dëshirë se Reali për ta fituar ndeshjen.”
Tekniku i Realit, francezi Zinedine Zidane, po ashtu e shfaqi hapur lumturinë për rezultatin.
“Eshtë një rezultat i mirë. Do të kishte qenë më mirë të shënonim një gol, por rezultati nuk ndryshon asgjë. Ndeshja e kthimit do të jetë 50 me 50.”
“Ishte një ndeshje e vështirë, por ne mund të përmirësohemi gjithmonë. Ishim më mirë në pjesën e dytë se në të parën.”
Takimi i kthimit do të jetë të mërkurën e 4 majit. /tesheshi.com/
