Shtetet e Bashkuara të Amerikës dhe Rusia nuk ia dolën sot t’i finalizojnë përpjekjet për një marrëveshje armëpushimi në Siri, ashtu siç qe paralajmëruar më herët.
Negociatorët kanë qenë optimistë për arritjen e një marrëveshjeje gjatë takimit të G20-tës. Zyrtarët amerikanë madje i kanë ftuar gazetarët për një deklaratë të planifikuar nga kryediplomatët e dy vendeve, John Kerry e Sergey Lavrov. Sekretari amerikan i Shtetit do të deklaronte më pas se nuk ishte finalizuar asnjë marrëveshje.
Kerry tha se dy palët kishin punuar mbi çështje teknike, kurse zëvendësministri i Jashtëm rus, Sergei Ryabkov, u shpreh se një marrëveshje ishte afër, por se koha për shpalljen e saj nuk mund të parashikohej.
“Ne po bisedojmë mbi çështjet më serioze të zbatimit të një armëpushimi,” i ka thënë ai Reuters-it. “Ne jemi pranë marrëveshjes, por arti i diplomacisë kërkon kohë për zbatim. Nuk mund t’u them kur do të arrihet marrëveshja.”
Presidenti Obama do të thoshte se ka ende dallime të mëdha mes palëve. “Eshtë e parakohshme për ne të themi se ka një udhë të qartë përpara, por ekziston së paku mundësia që të bëjmë njëfarë përparimin në atë front,” ka deklaruar ai ndërsa gjendet në Kinë për takimin e G20-tës.
Negociatat mes Kerry-t dhe Lavrov-it do të vazhdojnë në Kinë të hënën.
Departamenti Amerikan i Shtetit e ka bërë të qartë gjatë ditëve të fundit, siç njofton Al Jazeera, se kërkon një armëpushim në të gjithë Sirinë, e jo një tjetër “ndërprerje luftimesh”, që është e kufizuar në kohë dhe i ndalon luftimet vetëm në disa qytete e rajone. /tesheshi.com/
