Viti 2016 nuk do të largohet pa “teka”. Meteorologët parashikojnë që ditët e fundit të këtij viti do të jenë më të ftohtat.
Kështu, zonat malore do të preken nga temperatura shumë të ulta, të cilat mund të arrijnë deri në -12 gradë Celcius.
Sipas meteorologëve, i ftohti polar do të qëndrojë në vendin tonë deri në ndërrimin e viteve. “Dita më e ftohtë e vitit do të jetë data 31 dhjetor ku termometri do të shënojë -12 gradë Celcius poshtë zeros në zonat malore, ndërsa në bregdet dhe zonat e ulta temperaturat do të jenë -4 deri në -7 gradë”, theksojnë meteorologët.
Reshjet e dëborës gjatë kësaj jave në zonat malore të Shqipërisë do të jenë të pakta. Pas fundjavës dhe ndërrimit të viteve pritet të ketë një përmirësim të temperaturave, të cilat do të rriten gradualisht. /tesheshi.com/
