Krisja e parë ndërmjet themeluesve të PD-së dhe roli “asnjanës” i doktorit në shkarkimin e Azem Hajdarit…
Ka disa ditë që demokratët po presin me ankth fjalën e Berishës për debatin në PD pas humbjes. Të gjithë e kanë pritur një qëndrim të tij, pro apo kundër Bashës, pro apo kundër kritikëve të këtij të fundit; pro apo kundër Eduard Selamit, por asgjë, çuditërisht asgjë, nga njeriu “gojëçorap” për çdo gjë. Dhe ky qëndrim i paqartë i Berishës me sa duket nuk do të vijë deri pas zgjedhjeve të 22 korrikut. Shenjat janë të qarta.
Por nuk është hera e parë që ish-lideri demokrat shfaqet në këtë pozicion “as mish as peshk”, me një heshtje që në fakt nuk i shkon, pasi sokëllimat e tij politike mund të quhen dhe kolonë zanore e 26 viteve pluralizëm. Berisha është gjendur në një situatë të tillë shumë vite më parë, në kohën kur themeluesit e PD-së nisën të shfaqin etjen për pushtet. Ishte koha kur po shkarkohej Azem Hajdari dhe pasardhësi i tij në krye të PD-së do të instalonte përgjithmonë pushtetin e tij personal. Padyshim që Berisha ishte një ndër ta dhe më kryesori.
Në gjysmën e dytë të shkurtit të vitit 1991, ndërsa PD-ja ishte në procesin e saj të organizimit, po shfaqeshin disa probleme mes grupit të themeluesve. Brenda një muaji ishin larguar për shkak të debateve dy anëtarë të komisionit nismëtar, Shenasi Rama dhe Blendi Gonxhe, bashkë me tre të tjerë që largoheshin për arsye personale. Ishte momenti i dytë, kur në PD shfaqej debati.
Sipas dëshmisë së Arben Imamit, ai bashkë me Azem Hajdarin po shiheshin si krahu radikal brenda PD-së nga pjesa tjetër e kësaj partie. Ata akuzoheshin se po inspironin një reagim të ashpër të studentëve për të acaruar situatën, ndërkohë që PD-ja kishte bërë një marrëveshje me PPSH-në për ta mbajtur të qetë atë, deri në zgjedhjet e para pluraliste. Arben Imami shprehet se ishin të pashmangshme disa lëvizje që duheshin kryer. Ishte fjala për angazhimin e tyre në grevën e studentëve, e cila kishte nisur me organizimin e protestës së përditshme në sheshin e Qytetit Studenti, për t’u finalizuar pak ditë më pas në grevë urie dhe rrëzimin e bustit të Enver Hoxhës. Sipas Imamit, bashkë me Hajdarin, ata kishin nxitur dhe mbështetur këtë reagim.
Në këtë situatë, PD-ja kishte vendosur të mblidhte të parin Aktiv Kombëtar, për të konfirmuar organizimin e ri të partisë. Por situata shumë shpejt agravoi dhe aktivi u përshpejtua, me qëllim që të kryheshin zgjedhjet e para. Në rrethana të caktuara ishte vendosur të shkarkohej nga detyra e kryetarit të komisionit nismëtar të PD-së, Azem Hajdari. Qëndrimi i Berishës ishte me shumë rëndësi, sikurse sot, kur të gjithë presin prej tij për të parë se cilat do të jenë zhvillimet në PD.
Gjatë një intervistë të disa viteve më vonë, Arben Imami rrëfen se Berisha kishte qëndruar asnjanës në debatin për shkarkimin Hajdarit, siç po duket të jetë sot në garën e dytë të Lulzim Bashës për postin e kryetarit të PD-së. Në atë kohë kur kërkohej një qëndrim i tij për Hajdarin, Berisha po priste ta zinte vetë atë karrige të kryetarit të PD-së. Sot kërkohet sërish një qëndrim prej tij dhe ai sërish po hesht. Heshtja e tij duket se edhe kësaj radhe shkon për llogari të Lulzim Bashës sepse ka pak gjasa që ajo të favorizojë Eduard Selamin.
Ja si e rrëfen Arben Imami “asnjanësinë” e Berishës në shkurt të vitit 1991:
“Vendimi erdhi, sepse kishte dy pikëpamje në parti. Kishte një pikëpamje, që ishte ndoshta më radikale, nuk po të them më e drejtë apo jo, megjithëse besoj se po; kjo përfaqësohej nga Azemi dhe unë (Arben Imami). Kishte dhe një tjetër pikëpamje për qëndrime dhe lëvizje të kujdesshme dhe të moderuara. Shkaku i ballafaqimit që evidentoi këtë ndarje në PD-në e asaj kohe u bë greva e studentëve, që kulmoi me grevën e urisë. Na sulmuan pothuajse të gjithë. Berisha qëndroi në mes. Ishte e vështirë të binin dakord me këtë rrugë. Kjo situatë dhe të tjera që pasuan ato ditë, çuan në zgjedhjet e para brenda PD-së, ato të shkurtit 1991. Ajo krizë u zgjidh me zgjedhje në parti dhe procesi ishte demokratik. U thirr Aktivi dhe pasi u zgjodh kryesia e parë nga ky Aktiv, kryesia zgjodhi kryetarin dhe sekretarin e PD-së.” /tesheshi.com/
