Gjyqtarja Arta Rama-Hajrizi është zgjedhur kryetare e Gjykatës Kushtetuese të Kosovës. Zgjedhja është bërë nga gjyqtarët e Gjykatës Kushtetuese të Kosovës në seancën e mbajtur sot, në përputhje me Nenin 114, pika 5, të Kushtetutës së Republikës së Kosovës.
Gjyqtarja Arta Rama-Hajrizi do të marrë postin e Kryetarit të Gjykatës Kushtetuese të Kosovës pasi të përfundojë mandati i kryetarit aktual të Gjykatës, Enver Hasani, më 26 qershor 2015. Mandati i Kryetarit të Gjykatës Kushtetuese të Kosovës është tre vjet.
