Presidenti amerikan Donald Trump la të kuptohet se do të heqë dorë nga planet për të mbledhur paratë e ndërtimit të murit me Meksikën gjatë vitit 2017. Fatura e shpenzimeve qeveritare që mbyllet këtë javë, pritet të mos përfshijë zërin e ndërtimit të murit me Meksikën, premtim i bujshëm elektoral i presidentit Trump.
Këshilltarja e Presidentit, Kellyanne Conway, bëri të qartë se financimi i murit do të mbetej jashtë buxhetit që duhet kaluar të premten. Ngritja e murit ishte një prej zotimeve themelore të fushatës dhe, sipas Trump, për të do të paguante Meksika.
Nga ana tjetër qeveria meksikane ka bërë të qartë se nuk do të paguajë asnjë cent për këtë qëllim. Ndërkohë, demokratët kishin kërcënuar se do ta bllokonin projektligjin nëse do të përfshinte faturën e murit.
Kongresi ka vetëm pak ditë kohë në dispozicion për të arritur marrëveshjen e buxhetit 2017 dhe nëse ligjvënësit nuk bien dakord deri në mesnatën e 28 prillit, qeveria amerikane do të mbyllet.
Megjithatë, presidenti Trump ka këmbëngulur se mbështet ndërtimin e murit duke shkruar në Tëitter se diçka e tillë do të ndodhë. /tesheshi.com/
