Bisedimet e së dielës në Doha të Katarit kanë përfunduar pa asnjë sukses të qenësishëm, ndërsa prodhuesit më të mëdhenj të naftës nuk kanë arritur një marrëveshje për të frenuar prodhimin e naftës dhe për të garantuar tregun për një mëkëmbje të çmimeve.
Organizata e Vendeve Prodhuese të Naftës, si dhe prodhues të tjerë, patën bisedime të gjata për të rënë dakort që prodhimi i përditshëm mesatar i naftës nuk do t’i kalojë në muajt e ardhshëm nivelet e janarit të këtij viti.
Mosarritja e një pajtimi pas gjashtë orësh diskutime e detyruan ministrin e Energjisë së Katarit të deklarojë se negociatat do të vazhdojnë gjer në një takim tjetër të OPEC-ut në qershor.
Një prej arsyeve që çuan në dështimin për të arritur një marrëveshje ishte dhe pjesëmarrja jo e plotë e delegacioneve. Spikatëse ishte mungesa e përfaqësuesve të Iranit.
Megjithatë, edhe pse nuk dërgoi një delegacion, Irani e bëri të qartë se nuk do të pranonte asnjë propozim për të frenuar prodhimin gjersa aksionet iraniane të naftës në bursë të arrinin në nivelin para sanksioneve. /tesheshi.com/
