Kryetari i komunës së Çairit, Izet Mexhiti në një intervistë për REL ka folur rreth zhvillimeve të fundit, gjegjësisht për vendosjen e shqiponjës në komunën e Çairit në Shkup.
Ai shqiponjën e ka krahasuar me përmendoret që VMRO-DPMNE-ja i ka vendosur në tërë qytetin. Sipas tij, nëse mundet në Shkup të ketë luana dhe dema, apo një kopsht zoologjik të tërë me përmendore, pse të mos ketë edhe shqiponjë dykrerëshe?!
Ndërsa sa i përket vendimit të Këshillit Komunal të komunë së Butelit për vendosjen e kryqit gjigant në lartësi prej 55 metrash në vendbanimet ku pjesa dërmuese janë pjesëtarë të komunitetit shqiptar dhe mysliman, sipas Mexhitit është një formë e keqpërdorimit të simboleve fetare për politika ditore nga ana e partnerit të koalicionit VMRO-DPMNE.
“Ne vlerësojmë se minarja duhet të jetë në xhami, njëjtë sikur kryqi në kishë. Nuk është vendi i minares apo kryqit në udhëkryq”, potencoi ndër të tjerash Mexhiti. /tesheshi.com/
