Zv/ministrja e ShëndetësiëMira Rakacolli hodhi poshtë akuzat e opozitës se në Shkodër po fshihet realiteti i infektimeve, ndryshe nga ai që ofrohet zyrtarisht.
“Në Shkodër nuk ka asnjë arsye të fshihet realiteti, përkundrazi. Rastet që janë gjetur në Shkodër janë gjetur nga hetimi epidemiologjik. Një pjesë e të infektuarve nuk kanë paraqitur asnjë shenjë. Nëse nuk do të kishte shkuar personi i shëndetësisë, ato raste nuk do ishin zbuluar. Këtu ka ndodhur e kundërta, jo akuza që po fshihen rastet, përkundrazi, kanë dalë rastet. Në Shkodër rastet nuk erdhën vet për t’u testuar, i zbuloi hetimi epidemiologjik”, tha Rakacolli gjatë një intervistë në A1 Report.
Ajo ofroi dhe një shifër hipotetike infektimesh nëse nuk do ishin zbatuar masat shtrënguese.
“Janë bërë kalkulime të ndryshme. Ky ishte një virus i panjohur, nuk dihej si do bëhej shpërndarje, por nisur nga modelet e tjera në vendet e tjera, është menduar se mund të kishim edhe 18 mijë të sëmurë”, tha nr.2 i shëndetësisë shqiptare.
Më tej, ajo potencoi atë se ç’është pozitive në këtë situatë.
“Pozitive është ulja e numrit të të shtruarve në spitale, me këtë fillon të matet graviteti. Kryesorja është që shumica e të sëmurëve nuk janë në gjendje të rëndë. Në repartin e kujdesit intensiv është një numër i vogël. Shenjat e mira të dominimit të epidemisë janë numrat e të sëmurëve që kanë nevojë për kujdes shëndetësor”, tha zv.ministrja Rakacolli. /tesheshi.com/
