Nr.2 i OSBE-së në Tiranë, Robert Wilton, ka përcjellë një mesazh që shkon kundër me pretendimet e opozitës se votat në zgjedhjet e fundit janë blerë, e kjo deri në atë pikë sa mund të kenë ndryshuar rezultatin. Ai ka pranuar probleme, ndoshta dhe blerje mes tyre, por duke thënë se kjo praktikë ka qenë prezente te të gjitha forcat. E megjithatë sipas tij, kjo nuk e ka ndryshuar rezultatin.
“Ka patur probleme me shitblerjen e votës: Po! A mund të ndryshonin këto rezultatin e zgjedhjeve: Jo! A është vetëm një subjekt me këto probleme: Jo! Votuesit kanë patur mundësi për të shprehur zgjedhjen e tyre, pasi e kanë vetë në dorë. Ndoshta për dikë 50 leke janë mjaftueshëm, por nuk i blen vetëm një subjekt”, tha Wilton gjatë një qëndrimi në Shkodër.
Më tej, ai tha se kudo ka skandale, edhe zgjedhjesh, por që gjuha në politikën shqiptare është e papranueshme. Madje ai shprehu çudi se si politikanët që akuzojnë nuk i tremben deri dhe burgut.
E kjo sipas tij është skandali më i madh në politikën shqiptare, pra gjuha akuzuese e pandëshkuar.
“Të ashtuquajturat skandalet në Shqipëri nuk janë unike. Janë të njëjtë me Europën Perëndimore, SHBA etj. Kur shoh diçka të keqe në Shqipëri mund të them që tre here me të keqe e shoh në Angli. Dallimi është retorika politike në Shqipëri ka arritur jashtë realiteti. Politikanët këtu i thonë njeri-tjetrit gjëra që do i rrezikonin lirinë si vepër penale. Drejtësia dhe media nuk po ofron mbrojtje”, deklaroi Wilton, zv/ambasadori i OSBE-së në Tiranë. /tesheshi.com/
