Një grua spanjolle 38 vjeçe është sulmuar nga një peshkaqen ndërsa ka qenë duke notuar rreth 20 metra larg bregut në plazhin në ishujt Kanarie. Incidenti, i cili është verifikuar në Arinaga në Gran Canaria është bërë i ditur nga vetë 38-vjeçarja Cristina Ojeda, e cila ka publikuar imazhet e plagëve të marra në Twitter.
Në krahun e gruas kanë ngelur të ‘fotografuar’ dhëmbët e peshkaqenit. Për fat të mirë, dëmtimi i gruas nuk ka qenë i madh dhe këtë e ka bërë të ditur vetë Ojeda.
“Pata një përballje me një peshkaqen”,- tregon në rrjetin social mjekja madrilene ndërsa shton “janë gjëra që ndodhin nëse noton në Kanarie në dhjetor”. Sipas El Pais online, gjatë muajve të fundit është regjistruar rritja e numrit të peshkaqenëve që janë parë në afërsi të brigjeve të plazheve në ishujt Kanarie./tesheshi.com/
