Sulmuesi i Manchester City-t dhe Norvegjisë, atdheut të tij, Erling Haaland, shënoi kundër West Ham-it, duke thyer një rekord 28-vjeçar të Premierligës angleze.
Me golin ndaj “çekiçëve”, Haaland arriti shifrën e 35 golave në një sezon të ligës. Kjo theu rekordin e mbajtur nga Andy Cole dhe Alan Shearer.
Dy sulmuesit legjendarë shënuan nga 34 gola secili në sezonet 1993/94 dhe 1994/95, me 42 ndeshje të luajtura në ligën angleze në atë kohë.
Haaland arriti të shënojë golin e 35-të në ndeshjen e tij të 31-të për Citizens në kampionat, ndërsa në të gjitha garat pas 45 ndeshjeve të luajtura është në golin e 51-të.
Duket se Manchester City po marshon pandalshëm drejt mbrojtjes së titullit në Angli, ndërkohë që në Champions do të përballen në gjysmëfinale me Real Madridin, me ndeshjen e parë që do të luhet më 9 maj. /tesheshi.com/
