Pas bisedës së djeshme telefonike mes Putinit dhe Erdoganit, e pas lënies së një pjekjeje mes tyre në shtator, në takimin e G20-tës, nesër pritet takimi i kryediplomatëve të Rusisë dhe Turqisë, si një hap tjetër drejt rigjallërimit të plotë të marrëdhënieve dypalëshe pas një krize shtatëmujore.
Takimi kokë më kokë mes Lavrovit dhe Çavushogllusë, dy ministrave të Jashtëm, do të kryhet në qytetin rus të Soçit. Çavushogllu e pati marrë shumë më herët ftesën për pjesëmarrje në Këshillin e Ministrave të Jashtëm të Bashkëpunimit Ekonomik të Detit të Zi.
Mes dy krerëve të diplomacisë do të diskutohen marrëdhëniet dypalëshe e avancimi i tyre, por nuk do të mungojë dhe diskutimi mbi konfliktin sirian.
Ky takim është gjithashtu një shenjë e qartë e lënies pas të një periudhe të errët në marrëdhëniet mes dy vendeve.
Ai pason komunikimin e djeshëm midis dy presidentëve, të ndjekur nga vendimi i Putinit për rivënien në lëvizje të marrëdhënieve tregtare mes Rusisë e Turqisë, e të heqjes së kufizimeve për qytetarët rusë që kërkojnë ta vizitojnë Turqinë. /tesheshi.com/
