Inflacioni në vendet që përdorin euron si monedhë ka arritur një tjetër shifër rekord, e nxitur nga një rritje e madhe e kostove të energjisë, e shkaktuar pjesërisht nga pushtimi i Ukrainës nga Rusia.
Norma e inflacionit në eurozonën 19-anëtare arriti një rekord prej 8.6 përqind në qershor, sipas shifrave të fundit të publikuara të premten nga agjencia statistikore e Bashkimit Evropian, Eurostat.
Inflacioni është në nivelin më të lartë që kur këto të dhëna nisën të regjistroheshin për euron në vitin 1997, raporton AP.
Çmimet e produkteve energjetike u rritën me 41,9 për qind, ndërsa çmimet e ushqimeve, alkoolit dhe duhanit me 8,9 për qind; të dyja kategoritë u rritën më shpejt se ajo që u regjistrua në muajin e kaluar.
Çmimet e energjisë janë rritur ndërsa ekonomia globale rimëkëmbet nga pandemia, por pushtimi rus i Ukrainës vetëm sa e ka përkeqësuar situatën.
Udhëheqësit e Bashkimit Evropian kanë rënë dakord të ndalojnë importet e shumicës së mallrave ruse deri në fund të vitit, pasi blloku 27-vendesh kërkon të ndëshkojë Moskën dhe të zvogëlojë varësinë e saj nga energjia ruse, por kjo vetëm sa përkeqëson problemet financiare për qytetarët mesatarë si faturat e energjisë dhe karburantit. /tesheshi.com/
