Shpallja e Arbër Zaimit, “shqiptarit të Shqipërisë” të inkuadruar në Vetëvendosje si person “non grata”, na kujton se kjo histori e bërjes hasha të “vëllait për vëllanë” nga njëra anë e kufirit në tjetrën, ka nisur me një person fetar.
Pak vite më parë, do ishte Xhemal Duka, një imam nga Elbasani, i cili do deportohej nga Kosova në Shqipëri, duke u shpallur si person i padëshiruar. Ai shërbente prej vitesh në Marinë të Skënderajt, ku, duke vepruar dhe si aktivist humanitar, kishte kontribuuar dhe në vepra publike si rrugë dhe çezma, por që nga disa qarqe lokale u pa krejt me një sy tjetër, si një individ që po instalonte një frymë ekstremiste fetare në zonë.
Dhe në krye të fushatës që u finalizua me largimin e tij nga Kosova drejt Shqipërisë, ishte një vetëvendosëse, asambleistja e komunës së Skënderajt, Ajneshahe Halimi, e cila do largohej më pas nga partia e Albin Kurtit duke i akuzuar rëndë dhe ish-bashkëpartiakët e saj në udhëheqje për ekstremizëm politik.
Xhemal Duka u kthye në Elbasan, e që prej atëherë vijon jetën normale, por pa mundur të kthehet në Kosovë.
E pra, disa vite më pas, të njëjtin fat po e kanë dhe eksponentë të Vetëvendosjes, siç Bojken Abazi e së fundi Arbër Zaimi, të cilët u damkosën si persona “non grata” nga shteti i Kosovës në të njëjtën kohë me bëmëmadhin Vojisllav Sheshel.
Ky është një tjetër rast kur dinakëritë dhe inatet politike tek shqiptarët, sundojnë mbi parimet atdhetare. /tesheshi.com/
