Një tjetër deputet i PD-së është përjashtuar gjatë seancës së sotme plenare, pasi shkeli rregulloren. Flamur Noka ka kërkuar fjalën për proçedurë, në një kohë kur në foltoren e Kuvendit po fliste deputeti i LSI-së, Shezai Rrokaj.
Noka ka këmbëngulur t`i jepej fjala, pas replikave që kishte ish-kryeministri Sali Berisha me ministrin e Jashtëm, Ditmir Bushati. Kryetari i Kuvendit i ka tërhequr vëmendjen deputetit Noka, i cili ka insistuar në marrë fjalën. Në këto kushte Gramoz Ruçi, referuar rregullores së Kuvendit ka ndërprerë seancën për një pushim 5 minutësh duke përjashtuar deputetin demokrat nga seanca.
Pas përjashtimit të Lulzim Bashës një javë më parë, Noka është deputeti i dytë i PD-së që ndëshkohet nga Ruçi. Nuk dihet nëse kryetari i Kuvendit do të kërkojë një masë tjetër ndaj Nokës, pra një përjashtim më të gjatë, apo gjithçka do të mbyllet me “dënimin” për 1 seancë. /tesheshi.com/
