Noel Malkolm, historiani dhe akademiku britanik, i njohur posaçërisht për librat historikë për Kosovën dhe Bosnjen, ka botuar sivjet një libër lidhur me historinë e Rilindjes Europiane, duke zbuluar kufirin e harruar ku Lindja dhe Perëndimi u takuan në Ulqin. Ai këtë e bën duke përcjellë jetën e dy familjeve shqiptare, Bruni dhe Bruti.
Gjatë gjysmës së dytë të shekullit XVI, shumica e shteteve të krishtera të Evropës Perëndimore kanë qenë në pozicion mbrojtjeje nga një superfuqi muslimane siç ishte Perandoria Osmane.
Ka pasur konflikte të ashpra në atë kohë, por ka pasur gjithashtu shumë forma të ndërveprimit paqësor përgjatë kufijve çuditërisht të brishtë të këtyre blloqeve kundërshtare të pushtetit. Libri “Agjentët e Perandorisë” përshkruan shtigjet e marra nëpër Mesdheun Lindor dhe rrethinat e saj evropiane nga anëtarët e dy familjeje shqiptare nga Ulqini, Bruni dhe Bruti, të gjithë pothuajse të padukshëm në histori më parë. Këto dy familje përfshijnë një kryepeshkop në Ballkan, kapitenin e një anijeje papale në Betejën e Lepantos, pushtetin pas fronit në provincën osmane të Moldavisë dhe një përkthyes pranë ambasadës se Venedikut në Stamboll. Nga rrënjët e tyre shqiptare, rrjetet e lidhjeve familjare dhe kontaktet shtriheshin në të gjitha drejtimet, duke i rënë kryq e tërthor barrierave të besimit dhe kombësisë.
Noel Malkolm hedh dritë të re mbi botën në mes Venedikut, Romës dhe Perandorisë Osmane, duke ndriçuar subjekte të ndryshme si spiunazhi, diplomacia, tregtia e grurit, shitblerja e skllevërve dhe rebelimet anti-osmane. Ai përshkruan strategjitë kontradiktore të fuqive eurpiane dhe planet ambicioze të sulltanëve dhe vezirëve të tyre.
/tesheshi.com/
