Ish-kryeministrja e Mianmarit Aung San Suu Kyi u shpall fajtore për mashtrim zgjedhor të premten dhe u dënua me tre vjet burg me punë të rëndë, tha një burim i njohur me procedurat gjyqësore për Reuters.
Një burim nga gjykata, i cili ka dashur të mbetet anonim, ka thënë se nuk është e qartë se çfarë do të jetë puna e detyruar.
Një tjetër i pandehur, Win Myint, presidenti i rrëzuar i Mianmarit, mori të njëjtin dënim, tha burimi.
Mediat nuk janë lejuar të marrin pjesë në seancën gjyqësore, e cila u zhvillua me dyer të mbyllura në Gjykatën Speciale.
Ajo përballet me 190 vite burg
Nëse shpallet fajtore për të gjitha akuzat për të cilat ajo është në gjyq për më shumë se një vit, Suu Kyi mund të dënohet me një total prej më shumë se 190 vjet burg.
Laureatja e çmimit Nobel për Paqe, Suu Kyi, 76 vjeç, e cila ka qenë në paraburgim që kur ushtria organizoi një grusht shteti që përmbysi qeverinë e saj në shkurt të vitit të kaluar, përballet me një duzinë akuzash, të cilat ajo i mohon të gjitha dhe tashmë është dënuar me më shumë se 17 vite burg.
Një gjykatë zbuloi të premten se ish-këshilltarja shtetërore kreu mashtrim në zgjedhjet e përgjithshme të nëntorit 2020, në të cilat Lidhja e saj Kombëtare për Demokraci (NLD) mundi një parti të formuar nga ushtria me një shumicë të madhe.
Ushtria më pas kreu një grusht shteti, duke e justifikuar atë me gjoja mashtrime elektorale.
Më 1 gusht, regjimi ushtarak i Mianmar zgjati gjendjen e tij të jashtëzakonshme deri në vitin e ardhshëm dhe vendi mbetet i ndarë nga mosmarrëveshjet e brendshme pas grushtit të shtetit ushtarak të vitit të kaluar. /tesheshi.com/
