Çmimi Nobel për Mjekësinë për vitin 2015 është ndarë për tre shkencëtarë që kanë punuar në trajtimin e sëmundjeve infektive dhe malarjes. Kështu çmimi ka shkuar në duart e irlandezit, William C. Campbell dhe japonezit Satoshi Omura, për zbulimet e tyre në lidhje me një terapi të re kundër infeksioneve të shkaktuara nga parazitët si dhe për shkencëtaren kineze Youyou Tu për kërkimet e saj për terapinë e re kundër malarjes.
Njoftimi i Nobelit për Mjekësinë hap sezonin e ndarjes së çmimeve prestigjioze në Intitutin Karolinska të Stokholmit.
Kandidatët për këtë çmim, këtë vit, ishin 327, mes të cilëve 57 të nominuar për herë të parë. Shuma e parave që do të ndahen është gati 900 mijë euro.
Përgjatë mijëvjeçarëve, njerëzimi ka qenë nën kërcënimin e sëmundjeve të lidhura me parazitët. Campell dhe Omura kanë zbuluar një trajtim të ri, Avermectin, një medikament i aftë të luftojë parazitët që shkaktojnë verbëri dhe probleme limfatike.
Medikamenti mund të luftojë edhe disa sëmundje të tjera të shkaktuara nga parazitët. Ndërsa kinezja Youyou Tu ka arritur të zbulojë medikamentin Artemisinin, që është në gjendje të reduktojë pasojat e malarjes. /tesheshi.com/
