Ka marrë fund odiseja e çmimit Nobel për Letërsinë, të pranuar nga Bob Dylan më shumë se tre muaj pas ceremonisë së ndarjes së çmimeve, ku ai nuk do të merrte pjesë.
Këngëtari 75-vjeçar e mori çmimin në një aktivitet privat në Stokholm përpara se të jepte një koncert në të njëjtin qytet.
Sipas një anëtari të Akademisë Suedeze, ceremonia qe e përmasave të vogla, mes një rrethi të ngushtë, ashtu siç kishte dashur dhe Dylan-i.
Sidoqoftë, Bob Dylan duhet të japë një leksion brenda gjashtë muajsh, që nga 10 dhjetori, me qëllim që të marrë vlerën monetare të çmimit. Ai ka njoftuar se nuk do ta bëjë këtë gjë gjatë kësaj jave, porse do të dërgojë më vonë një version të regjistruar.
Çmimi Nobel për Letërsinë, që rëndom u jepet shkrimtarëve, shkoi për Bob Dylan-in me motivacionin për “krijimin e shprehjeve të reja poetike brenda traditës së madhe amerikane të këngës”. /tesheshi.com/
