Pierre Agostini, Ferenc Krausz dhe Anne L’Huillier kanë fituar çmimin Nobel në Fizikë për vitin 2023. Ata fituan çmimin për “metodat eksperimentale që gjenerojnë impulse drite attosekondë për të studiuar dinamikën e elektroneve në materie”, njoftoi komiteti i çmimit.
Sipas deklaratës, ata “demonstruan një mënyrë për të krijuar impulse jashtëzakonisht të shkurtra drite që mund të përdoren për të matur proceset e shpejta në të cilat elektronet lëvizin ose ndryshojnë energjinë”.
“Eksperimentet e laureatëve prodhuan impulse drite aq të shkurtra sa ato maten në attosekonda, duke demonstruar se këto pulse mund të përdoren për të marrë imazhe të proceseve brenda atomeve dhe molekulave,” tha Akademia Mbretërore Suedeze e Shkencave. “Eksperimentet e tyre i dhanë njerëzimit mjete të reja për të eksploruar botën e elektroneve brenda atomeve dhe molekulave”.
Gruaja e pestë që fiton çmimin për fizikë
Pierre Agostini është nga Universiteti Shtetëror i Ohajos, Ferenc Krausz është nga Instituti Max Planck për Optikë Kuantike dhe Universiteti Ludwig Maximilian në Mynih, dhe Anne L’Huillier është nga Universiteti Lund në Suedi.
L’Huillier është gruaja e pestë që fiton çmimin Nobel në Fizikë.
“Ky është një çmim jashtëzakonisht prestigjioz dhe jam shumë e lumtur që e kam marrë këtë çmim. Siç e dini, nuk ka shumë femra që e kanë marrë këtë çmim, ndaj është shumë i veçantë”, tha ajo në konferencën për media. /tesheshi.com/
