Presidenti Thaçi e promovoi akoma dhe më fort tezën e hedhur dy ditë më parë në Has, teksa morri titullin “Qytetar Nderi”, ku kërkoi bashkim të Shqipërisë me Kosovën, siç tha, nën “ombrellën e Bashkimit Europian” ose nën “ombrellën e shqiptarisë”.
Gjatë një fjalimi në 20-vjetorin e operacionit “Shigjeta DO-2” dhe luftimeve në Pashtrik, aty ku ndahet Shqipëria me Kosovën, Thaçi deklaroi.
“Po krijohen edhe rrethana të reja që zgjidhja më e mirë do të ishte që të dy parlamentet ai i Kosovës dhe Shqipërisë të nxjerrin deklaratat e nevojshme të vullnetit të popullit të Kosovës dhe Shqipërisë që të jetojmë në një shtet të përbashkët pa kufij”, tha Thaçi, duke u duartrokitur fort nga të pranishmit.
Kjo tezë e tij e re, pra e bashkimit kombëtar të dy anëve të kufirit, pason atë të korrigjimit të kufijve, të cilën e përkthen si kalim nga Serbia në Kosovë i tre komunave shqiptare në jug të Serbisë; Preshevës, Medvegjës dhe Bujanocit. /tesheshi.com/
