Rafa Benitez i ka dhënë Njukasëllit shpresë, thotë ish-sulmuesi Alan Shearer, pasi skuadra barazoi 1-1 një ditë më parë ndaj Mançester Sitit.
Njukasëlli ka marrë katër pikë në dy ndeshje, duke fituar të shtunën 3-0 ndaj Suonsi Sitit, e duke barazuar ndaj Man. Sitit.
“Tani ka pak shpresë, kur para pak javësh nuk kishte,” i ka deklaruar radiostacionit të BBC-së Alan Shearer, që ka luajtur për dhjetë sezone me Njukasëllin.
Në takimin e së hënës, qenë miqtë e Man. Sitit ata që kaluan të parët në epërsi me goli e të zakonshmit Aguero në minutën e 14-të. Vurnpn Anita barazoi shifrat 17 minuta më pas.
Njukasëlli ka 29 pikë, e renditet në vend të parafundit në klasifikimin e kampionatit anglez, por ende ka shpresë se mund t’i shpëtojë rënies nga kategoria.
Shearer ka thënë se Njukasëlli i ka dhënë vetes një mundësi, duke e falënderuar ndërkohë trajnerin spanjoll për zgjedhjen e tij të formacionit.
“Tifozët e vlerësojnë tani faktin se lojtarët po japin gjithçka. Atij (Benitez-it) i është dashur kohë t’i kuptojë lojtarët. Por ai ka lënë jashtë lojtarë të mëdhenj. Aleksandar Mitrovic është jashtë, Jonjo Shelvey është jashtë. Ata janë jashtë për një arsye. Nuk kanë dhënë aq sa duhet për ekipin.”
Sidoqoftë, Shearer mendon se nëse Benitez do të ishte vënë më herët në krye të Njukasëllit, gjërat do të kishin qenë ndryshe. Sipas tij, skuadra nuk do të rrezikonte rënien me spanjollin të ulur më herët në stol.
Benitez kthehet këtë të shtunë në një vend që ai e njeh mjaft mirë. Njukasëlli do të luajë të shtunën në “Anfield” ndaj Liverpulit, skuadrës që Benitez e drejtoi për vite të tëra.
“Lidhja ime me Liverpulin është e qartë…,” thotë Benitez, “por ne duhet të fitojmë çdo ndeshje, nuk ka rëndësi se ku.” /tesheshi.com/
