Turqia thotë se ka përfunduar me sukses fushatën ushtarake shtatë-mujore Mburoja e Eufratit, në veri të Sirisë. Por, kryeministri turk, Binali Yildirim nuk ka përjashtuar operacione të reja ushtarake dhe nuk sqaroi se kur do të lënë Sirinë trupat turke.
Turqia e nisi operacionin gushtin e kaluar për të larguar militantët e ISIS larg kufirit të saj dhe gjithashtu, për të ndaluar avancimin e luftëtarëve lokalë kurdë.
Ndërkaq, pritet që Turqinë ta vizitojë sot sekretari amerikan i Shtetit, Rex Tillerson.
“Operacioni Mburoja e Eufratit ka qenë i suksesshëm dhe ka përfunduar. Çdo operacion që do të pasojë do të ketë një emër tjetër”, tha Yildirim pas takimit të së mërkurës me këshillin e sigurisë së vendit.
Ushtria dhe kryengritësit sirianë që mbështeten nga turqit kanë arritur të marrin nën kontroll disa qytete, përfshirë Jarablus, duke u zhvendosur më në fund në jug drejt qytetit strategjik Al-Bab.
Operacioni turk gjithashtu, synonte parandalimin e avancimit në terren në veri të Sirisë të njësive të mbrojtjes popullore kurde, YPG, pasi Ankaraja druhet se kjo do të nxiste një kryengritje nga ana e partisë së jashtëligjshme të partisë së Punëtorëve të Kurdistanit në jug-lindje të Turqisë.
YPG shihet si organizatë terroriste dhe zgjatim i PKK-së. /tesheshi.com/
