Një shqiptar, i cili gjatë luftës në Kosovë, u largua nga vendi dhe udhëtoi drejt SHBA, sot po ndihmon ata që për shkak të uraganit “Harvey” braktisën shtëpitë.
Kujtim Lokaj nga Deçani, pronar i një restoranti në Dallas të SHBA-ve, po ushqen falas të prekurit nga Harvey.
Ai ka shërbyer mbi 300 vakte për të larguarit nga shtëpitë e tyre për shkak të përmbytjeve.
Televizioni CBS ka realizuar një kronikë për Kujtimin, që tredon arsyen se përse po ndihmon ata që kanë mbetur pa shtëpi.
“Është e njëjta ndjenjë si atëherë kur na u desh të linim Kosovën. U larguam pa pasur asgjë me vete. Udhëtuam për ditë të tëra, pa e ditur se ku do të flemë, ku do të hamë dhe kjo është një situatë shumë e vështirë. Prandaj, çfarëdo që mund të bëj sot për të ndihmuar, për mua është një privilegj”, ka thënë Lokaj në një intervistë për CBS. /tesheshi.com/
