Nga Mensur Krasniqi
Teksa ndodhesh në qendër të Shkupit, aty ku statujat dhe godinat baroke t’i marrin vërtet mendtë, vështirë ta imagjinosh që pak, fare pak më tutje, do hasësh një realitet që nuk ka lidhje me atë lloj madhështie, gjegjësisht arrogante.
Sepse, jo më larg se një kilometër nga qendra e Shkupit, ndodhet lagjja më e shëmtuar në aspektin infrastrukturor, ajo e Serovës. Banorët e kësaj lagje pa plan urbanistik, përveç rrafshit hapësinor dhe problemeve të natyrave të ndryshme, qe dy vite të plota vuajnë për rrugë normale.
Dhe e gjithë kjo “falë” komunës së Çairit në krye me Izet Mexhitin. Kjo komunë ka paralajmëruar rregullimin e rrjetit të ujësjellësit me vite të tëra, ndërsa punimet në realizimin e këtij projekti shpesh herë kalojnë në faza me pushime afatgjate. Si pasojë e neglizhencës së komunës Çair, banorët e lagjes Serovë edhe sot e kësaj dite kanë mbetur pa rrugë të asfaltuar.
Rruga me gropa dhe e gërmuar nuk është problem që i tangon vetëm banorët e lagjes Serovë, mirëpo për këtë rrugë vërejtje kanë edhe shumica e qytetarëve tjerë që banojnë në lagje të ndryshme të komunës së Çairit meqë lagjja Serovë është ura lidhëse e gjitha vendbanimeve tjera përreth që dëshirojnë të shpiejnë në rrugën drejt qendrës së Shkupit.
Andaj portali tesheshi.com ka shkrepur disa fotografi të rrugëve dhe ka realizuar një intervistë me disa nga banorët e kësaj lagje për t’ia dëgjuar hallet e tyre. Ata nuk kursyen asnjë fjalë të keqe për zyrtarët e komunës së Çairit, madje e kujtuan kryetarin e kësaj komune, Izet Mexhitin se Serova është lagjja më e afërt e qendrës së Shkupit dhe se dallimet e infrastrukturës rrugore ku jetojnë shqiptarët dhe ku jetojnë maqedonasit janë astronomike.
“Këto rrugë që i ka Serova nuk i ka as Afganistiani e Taxhikistani, a çka po di unë. Nuk është në rregull kjo ne qe dy vjet jemi të detyrum me hec nëpër rrugë me gropa dhe me lloq(baltë). Çdoherë që bie shi këtu bëhet kaos. Njeri kupton me ardh me rregullu ujësjellësin ama jo me vjet me prit se tek e fundit nuk jena tu jetu n’katund po midis qytetit. Turp është kjo turp. Tash para zgjedhjeve e kanë zanat të vijnë dhe të nisin kinse punimet, e si kalojnë zgjedhjet harrohen krejt. Si duket kryetari nuk e ka kuptuar që Serova si lagje është shumë e madhe dhe lidhet direkt me qendrën ku po të dalësh andej do të duket sikurse ke dalur në ndonjë shtet perëndimorë. Pra kjo është ajo padrejtësia e madhe se këndej urës së gurit jetojnë shqiptarët, e andej maqedonasit të paktën punojnë për qytetarët e vet ”, shprehet i revoltuar një banor i kësaj lagje.
Ndërsa sipas një banori tjetër lagjja e Serovës, siç e kujton ai, para se të kishte shkuar në Zvicër dhe tani që është kthyer pas dy viteve në vendlindje nuk ka asnjë ndryshim pozitiv. Ai thotë: “Siç e lash ashtu e gjeta këtë vend me gropa”.
Portali tesheshi.com ka bërë përpjekje për ta kontaktuar kryetarin e komunës Çair, por ai ishte i pakapshëm për të dhënë prononcim rreth pakënaqësive nga banorët e lagjes Serovë. /tesheshi.com/
