David Balogun, një djalë nga Pensilvania, filloi të ndjek mësimet në një kolegj lokal pasi mbaroi me sukses shkollën e mesme në moshën 9 vjeç.
Davidi u diplomua duke ndjekur mësimet në shtëpinë e familjes dhe thotë se ka marrë shumë ndihmë dhe mbështetje nga mësuesit e tij. “Ata nuk më ndaluan. Ata u ngritën për mua dhe thanë: ai mund ta bëjë atë, ai mund ta bëjë atë,” tha David për një stacion televiziv lokal.
Kjo arritje e bën Davidin njeriun e dytë më të ri që mbaron shkollën e mesme, pas Michael Kearney i cili u diplomua në vitin 1990 në moshën 6-vjeçare.
Nëna e Davidit, Ronya, thotë se djali i tyre ka qenë gjithmonë jashtëzakonisht i interesuar të mësojë për gjëra të ndryshme dhe për këtë e kanë përgatitur që në moshë të vogël për suksese akademike, por që në edukimin e Davidit ka qenë e detyruar të mendojë gjithmonë jashtë standartit.
“David është një 9-vjeçar me aftësinë për të kuptuar koncepte shumë përtej moshës së tij dhe ndonjëherë edhe përtej të kuptuarit tim”, tha Ronya Balogun.
David është anëtar i Mensa-s, ai është i interesuar për programim, dhe pas përfundimit të kolegjit dëshiron të bëhet astrofizikan dhe të studiojë vrimat e zeza dhe supernovat. Përveç kësaj, në kohën e tij të lirë i pëlqen të luajë me motrën e tij, ku hobi i tij janë karateja dhe bejsbolli.
Davidi dëshiron të jetë frymëzim për të tjerët dhe të thotë se nuk është i vetmi që i ka këto “aftësi” dhe se ajo që ka arritur është shumë e mundur.
“E kuptova që mund të mbaroj shkollën e mesme para moshës 10 vjeç, por vetëm nëse përpiqem shumë dhe me ndihmën e prindërve të mi”, ka përfunduar 9-vjeçari student. /tesheshi.com/
