Ministrja e Shëndetësisë, Ogerta Manastirliu, ka shpërndarë përmes rrjeteve sociale historinë e një të riu shqiptar, të rritur jetim, por që ka arritur të integrohet në shoqëri duke gjetur një vend pune, madje edhe duke pasur banesën e tij.
Manastirliu vë theksin jo vetëm politikat sociale mbështetëse për këta të rinj, që kanë vullnet për të punuar, por edhe për të frymëzuar pse jo të tjerë që kanë ëndrra dhe pasione si Demokrati.
Historia
Historia e Demokratit është një histori suksesi që buron nga puna e mirë e shërbimeve tona të mbrojtjes sociale, por njëherësh, është një rast frymëzimi për shumë të rinj që me mbështetje e vullnet, mund t’ja dalësh! Demokrat Lloci është 19 vjeç dhe deri pak kohë më parë jetonte në Shtëpinë e Fëmijës ‘Zyber Hallulli’.
Falë programeve të mbështetjes dhe riintegrimit, ai ka gjetur punë dhe strehim. Demokrati sot është instruktor noti dhe ka nisur jetesën e pavarur, duke u kthyer në një shembull pozitiv dhe frymëzues për bashkëmoshatarët e tij që rriten në shtëpitë tona të përkujdesit. /tesheshi.com/
