Kompania shqiptaro amerikane ” Solaborate” ka filluar shitjen e pajisjes më të re të video-komunikimit të quajtur “HELLO”.
Ky produkt që transformon TV-të në pajisje profesionale të komunikimit, është lançuar ditë më parë nga themeluesit e rrjetit social “Solaborate”, Labinot Bytyqi dhe Mimoza Bytyqi.
Produkti është ndërtuar nga ekipi i tyre me bazë në Los Angeles në SHBA, Kosovë dhe Maqedoni dhe është mbështetur nga “Kickstarter” për të ngritur fonde dhe për ta bërë promovimin e inovacionit të saj më të ri.
Kjo pajisje, transformon çdo TV në një pajisje dhe platformë të plotë të komunikimit; mundëson video-konferenca të kontrolluara me zë dhe mund të përdoret në shtëpi apo zyra moderne.
Po ashtu, “HELLO”, bën shkëmbimin e ekraneve pa tela (ang. wireless screen-sharing), transmetimin live si dhe ofron mbikëqyrje për siguri me detektues lëvizjesh dhe më shumë.
Nëse ky trend i mbështetjes do të vazhdojë deri në ditët e fundit të fushatës, pritet që të bëhet sensacion i madh në mbarë botën, duke bërë shqiptarët pjesë të skenës teknologjike botërore.
