Shpesh herë mund të kemi dëgjuar të flitet apo edhe të njohim persona që janë poliglotë, por rrallë na ka zënë veshi e syri hiperglotë, pasi janë me të vërtetë të paktë të numër dhe të rrallë.
Hiperglotët janë persona që kanë aftësi të jashtëzakonshme të mësimit të gjuhëve të huaja. Të tillë janë personat që zotërojnë më së miri mbi 10 gjuhë të huaja, si në të folur edhe në të shkruar.
“The Economist” ka biseduar me një adoleshent hiperglot, i quajtur Timothy Doner, i cili shprehet se ka mësuar gjuhën arabe brenda vetëm një muaji. Donner shprehet se mësimi i gjuhës franceze, latine dhe greqishtes së vjetër është një ndihmë shumë e madhe për të mësuar lehtësisht gjithë gjuhët e tjera europiane.
Ai gjithashtu thotë se dëgjimi i muzikës në gjuhë të ndryshme mund të ndihmojë së tepërmi për shqiptimin e fjalëve.
Por, cila është aftësia e Donerit dhe miqve të tij hiperglotë? Çfarë kanë ata më të veçantë se personat e tjerë? Sipas studiuesve, gjithë sekreti qëndron në kujtesën e tyre, e cila është fantastike, dhe jo në vullnetin që këta njerëz kanë, siç mund të mendonin disa persona. Ata janë në gjendje të ruajnë informacione për një kohë të gjatë në kujtesën e tyre si dhe të mësojnë lehtësisht informacionet e reja. /tesheshi.com/
