Duke shprehur mbështetje për Izraelin kundër Hamasit palestinez dhe duke pretenduar se ajo dëshiron të mbrojë francezët me origjinë hebreje, liderja e së djathtës ekstreme franceze, Marine Le Pen, po përpiqet të joshë dhe të tërheqë drejt vetes elektoratin hebre, i cili ka qenë armiqësor ndaj atë në zgjedhjet e deritanishme, vlerësoi agjencia AFP.
“Marine Le Pen? Ajo sapo ndryshoi këngën, do të ketë gjithmonë idetë e babait të saj”, tha Nesod, 68 vjeç, përpara një supermarketi “kosher” në një lagje me shumicë hebreje të Parisit.
Marine Le Pen, 55 vjeçe, e cila kishte humbur dy herët e fundit në zgjedhjet presidenciale, kur u mund nga Emmanuel Macron në 2017 dhe 2022, ka qenë më popullore në sondazhe muajt e fundit, së bashku me partinë e saj.
Le Pen mori detyrën si presidente e partisë në vitin 2011, duke pasuar babanë e saj Jean-Marie, themeluesin e partisë. Që atëherë, ajo është përpjekur të zbusë pikëpamjet e ekstremit të djathtë të partisë dhe babait të saj, duke e kritikuar atë për antisemitizmin që ai shprehte publikisht.
Le Pen shkaktoi një skandal kur tha se dhomat gjermane të gazit në Luftën e Dytë Botërore ishin “vetëm një detaj në histori”.
Shumë hebrenj janë skeptikë
Marine Le Pen më vonë përjashtoi babanë e saj nga partia, së bashku me disa antisemitë të tjerë, në një përpjekje për të përmirësuar imazhin e partisë.
Një zëdhënëse e partisë së saj tha pas sulmit të Hamasit ndaj Izraelit më 7 tetor se hebrenjtë në Francë e dinë se kush i mbron ata, duke aluduar për partinë.
Analistët francezë vlerësojnë se Le Pen dalëngadalë po bëhet gjithnjë e më popullore, por kjo nuk mjafton, sepse shumë hebrenj janë skeptikë.
“Le Pen po na mashtron”, tha pariziani Joel, duke shtuar se ka hebrenj që do të votojnë për të djathtën ekstreme, por jo për Le Pen, por për Eric Zemmour, figurën e dytë të së djathtës ekstreme në Francë.
Zemmour, një ish-gazetar që është rivali i Le Pen, i befasoi të gjithë në zgjedhjet presidenciale të vitit 2022 duke fituar më shumë vota në disa zona hebreje sesa Le Pen. Megjithatë, në nivel kombëtar, ajo është shumë përpara tij. /tesheshi.com/
