Në muajin shtator fëmijët shqiptarë në Shqipëri dhe Kosovë me shumë gjasa do të mësojnë me tekste të njëjta.
Ka qenë kjo deklarata e Ministrit të Arsimit te Kosovës, Arsim Bajrami, sipas së cilit grupet e ngritura të punës nga të dyja palët po punojnë intensivisht për të njësuar kurrikulat e arsimit parauniversitar për vitin akademik 2015-2016.
“Kemi zbritur procesin nga niveli i Ministrave në nivel teknik, grupet tona kanë pasur progres. Kemi një kurrikul të unifikuar në arsimin parauniversitar dhe jemi duke punuar që të pregatisim dhe programe unifikuese sa i përket pregatitjes së mësimëdhënësve dhe teksteve mësimore. Urojmë që ky proces të përfundojë deri në fillim të shtatorit sepse po punohet me intensitet”,- tha ministri për ‘Ora News’.
Por puna e përbashkët e dy shteteve nuk do të mjaftojë vetëm me njësimin e kurrikulave në arsimin parauniversitar,ashtu sikurse Shqipëria edhe Kosova po bëhet gati për një draft të ri të arsimit të lartë.
“Jemi shumë mirë duke punuar tek arsimi i lartë. Shqipëria ka miratuar ligjin në qeveri dhe do jetë i diskutueshëm në Parlament. Në të njëjtën situatë jemi dhe ne. Dëshirojmë që të kemi korniza unike të sistemit arsimor si një nevojë e domosdoshme e të rinjve tanë që të integrohen nën një edukim pozitiv, nën një edukim të unisuar, të bashkuar në mënyrë që ne vërtet të relativizojmë kufirin tonë”,- u shpreh Bajrami.
