Prokurori i Përgjithshëm, Adriatik Llalla premtoi se do të ketë arrestime për rastet e hetuara nga njësia antikorrupsion, pas një takimi që pati në prokurinë e Krimeve të Rënda. Kjo njësi po heton 400 raste për korrupsion dhe grupe kriminale e për këtë ka nevojë për më shumë burime njerëzore, kërkesë që është pranuar nga prokuroria e përgjithshme.
Gjithsesi, Llalla nuk bëri komente për raste të caktuara, sado i nxitur nga pyetjet e gazetarëve për akuzat më të fundit në drejtim të ministrit të Brendshëm, Saimir Tahiri për lidhje me narkotrafikun në jug të vendit.
“Njësia Task-Force e Prokurorisë për Krime të Rënda, krahas numrit të lartë të procedimeve, tashmë ka mbështetjen e një numri më të madh prokurorësh, ekspertizën e specializuar të OPDAT-it dhe specialistëve vendas. Për këtë arsye, u kërkoj prokurorëve të njësisë Antikorrupsion pranë Prokurorisë për Krime të Rënda që të finalizojnë procedimet e deritanishme të korrupsionit dhe hetimit pasuror, si edhe vijojnë menjëherë me rastet që kanë nisur ose janë referuar kohët e fundit”, tha Llalla gjatë takimit ku u prezantuan edhe prokurorët e rinj që i shtohen njësisë. /tesheshi.com/
