Njeriu që tentoi të vriste zv/presidenten argjentinase: ç’do të thotë tatuazhi në krah?

Shërbimet e sigurisë së Argjentinës kanë konfirmuar identitetin e personit që tentoi të vriste zëvendëspresidenten argjentinase Christina Kirchner. Bëhet fjalë për brazilianin 35-vjeçar Fernando Andres Sabago Montiel.

Mediat argjentinase shkruajnë se Montiel ka lindur në Sao Paulo dhe se është djali i një kiliani dhe një argjentinaseje. Për më shumë se 20 vjet, ai ka jetuar në lagjen argjentinase të Villa del Parque. Ai ka punuar si shofer taksie, aktualisht është i papunë dhe tashmë është i njohur për policinë.

Montiel u akuzua vitin e kaluar kur policia e ndaloi në një makinë pa targa në mars. Më pas iu gjet një hanxhar i gjatë 35 centimetra.

Sipas fotove të publikuara në rrjetet sociale, 35-vjeçari shihet të ketë një tatuazh dielli të zi në bërryl.

Është një simbol nordik që u mor nga nazistët dhe shoqëria okulte Thule, e cila u themelua nga aristokratë të pasur dhe që mbrojti supremacinë e racës ariane. Nga viti 1918 deri në vitin 1922 grupi ka kryer 300 krime politike.

Sulmuesi tani ndodhet në burgun e Policisë Federale të Argjentinës në Villa Lugano dhe çështjen e tij e ka marrë përsipër gjyqtarja federale Maria Eugenie Capuchetti.

Kirchner, zëvendëspresidentja aktuale dhe ish-presidentja e Argjentinës, ishte dje me një shoqërim zyrtar para shtëpisë së saj në Buenos Aires kur Montiel u përpoq ta qëllonte nga afër. Por arma nuk u shkreh.

Javën e kaluar, qindra aktivistë u mblodhën para familjes Kirchner, e cila është akuzuar për korrupsion dhe mashtrim në dhënien e kontratave publike në Santa Cruz gjatë dy mandateve të saj presidenciale nga 2007 deri në 2015. /tesheshi.com/