Ukraina i ka dhënë shtetësinë gazetarit të shquar rus Alexander Nevzorov, i cili u largua nga Rusia me gruan e tij pasi denoncoi pushtimin rus të Ukrainës, tha një zyrtar i lartë i Kievit.
Rusia po kërkon arrestimin e Nevzorovit, duke e akuzuar atë për përhapjen e informacionit të rremë në lidhje me atë që Moska e përshkruan si “operacionin e saj special ushtarak” në Ukrainë. Gazetari dhe gruaja e tij u larguan nga Rusia në mars.
Anton Gerashenko, një këshilltar i Ministrit të Brendshëm të Ukrainës, tha se autoritetet në Kiev i kishin dhënë nënshtetësinë Nevzorovit dhe gruas së tij Linda.
Nevzorov konfirmoi se kishte marrë nënshtetësinë ukrainase në një postim në Telegram, në të cilin tha se “agresioni rus ishte një krim, viktima e të cilit ishte Ukraina”.
“Unë po mbaj anën e viktimës. Dhe u jam mirënjohës atyre njerëzve të torturuar, të dëshpëruar, të gjakosur të Ukrainës që më lejuan të zë vendin tim mes tyre”, tha ai.
Rusia ka nisur një hetim ndaj Nevzorovit, kanali i të cilit në YouTube ka më shumë se 1.8 milionë abonentë, pasi ai tha se forcat ruse kishin bombarduar qëllimisht një maternitet në Mariupol.
Hetimi filloi pasi Rusia miratoi një ligj në mars që parashikon dënime me burg deri në 15 vjet për përhapjen e qëllimshme të lajmeve “të rreme” për ushtrinë ruse.
Dhjetorin e kaluar, presidenti ukrainas Volodymyr Zelensky nënshkroi një ligj që thjeshton marrjen e nënshtetësisë ukrainase për rusët e persekutuar për arsye politike në vendin e tyre. /tesheshi.com/
