Irani ka tërhequr përkohësisht ambasadorin e tij në Stokholm për konsultime, në shenjë proteste kundër dënimit të dhënë në Suedi ndaj një ish-zyrtari iranian që mori pjesë në ekzekutimet masive dhe torturat e të burgosurve politikë në vitet 1980.
“Republika Islamike, në shenjë proteste për dënimin e paligjshëm të dhënë në Suedi kundër Hamid Noury… ka vendosur të tërheqë ambasadorin e saj në Suedi për konsultime,” tha zëdhënësi i Ministrisë së Jashtme iraniane Nasser Kanaani, sipas agjencisë iraniane të lajmeve ISNA.
Vendimi është “i bazuar në akuza të pabaza, të shtrembëruara dhe të sajuara”, shtoi Kanaani.
Më 14 korrik, një gjykatë suedeze dënoi Hamid Noury , 61 vjeç, me burgim të përjetshëm me akuzën se mori pjesë në ekzekutimet masive dhe torturat e të burgosurve politikë në vitet ’80.
Noury u arrestua në aeroportin e Stokholmit në vitin 2019, pasi disidentët iranianë në Suedi paraqitën raporte policore kundër tij dhe ai u dënua për “krime të rënda sipas ligjit ndërkombëtar” dhe “pjesëmarrje në ekzekutime”.
Procedurat, të cilat kanë vazhduar që nga gushti 2020, kanë përkeqësuar marrëdhëniet midis Suedisë dhe Iranit, pasi Teherani e hodhi poshtë vendimin si “politik”.
Sipas gjykatës, Noury ishte ndihmës prokuror në një burg afër Teheranit në kohën e ekzekutimeve masive dhe torturave të të burgosurve politikë.
Amnesty International (AI) vlerëson se rreth 5,000 njerëz u ekzekutuan me urdhër të qeverisë iraniane, dhe në një raport të vitit 2018 vlerësoi se “shifra aktuale mund të jetë më e lartë”.
Por Irani kurrë nuk i ka pranuar vrasjet. /tesheshi.com/
