Përfaqësuesi i Lartë në largim i Bashkimit Evropian për Punët e Jashtme dhe Politikën e Sigurisë, Josep Borrell, u bëri thirrje të enjten të gjitha shteteve anëtare të BE-së që të respektojnë vendimet e Gjykatës Ndërkombëtare Penale (ICC), duke përfshirë edhe urdhërarrestin për kryeministrin izraelit Benjamin Netanyahu.
“Ne nuk mund ta minojmë Gjykatën Penale Ndërkombëtare. Kjo është mënyra e vetme për të pasur drejtësi në nivel global”, tha Borrell, mandati i të cilit përfundon këtë muaj, pas së cilës Kaja Kallas do të marrë postin e shefes së diplomacisë evropiane
Borrell shtoi se vendimet e Gjykatës Ndërkombëtare Penale nuk janë politike, por se ajo është një organ ligjor “i formuar nga njerëz të respektuar që janë më të mirët në profesionin e gjyqtarëve”, raporton Reuters.
Gjykata Ndërkombëtare Penale javën e kaluar lëshoi urdhra arresti për Netanyahun, ish-shefin e tij të mbrojtjes Yoav Gallant dhe liderin e Hamasit Ibrahim al-Masri, i njohur si Mohammad Deif, për krime të dyshuara lufte dhe krime kundër njerëzimit gjatë luftës së Gazës.
Edhe pse të gjitha vendet anëtare të Bashkimit Evropian janë nënshkrues të traktatit themelues të Gjykatës Ndërkombëtare Penale, Franca tha të mërkurën se beson se Netanyahu ka imunitet nga procedurat e gjykatës, sepse Izraeli nuk është nënshkrues i statutit të saj.
Izraeli, i cili filloi një ofensivë në Gaza në përgjigje të një sulmi të Hamasit në Izraelin jugor më 7 tetor 2023, ka njoftuar se do të apelojë urdhër-arrestet e ICC-së për Netanyahun dhe Gallant. /tesheshi.com/
